【蘋果日報】【金像獎新晉導演篇】鮮浪潮大軍殺入影圈 李駿碩李卓斌影壇新勢力

報章︰蘋果日報

日期︰2019-4-8

 

入圍今屆香港電影金像獎新晉導演獎的名單,可謂卧虎藏龍,有兩位同時入圍金像獎最佳導演。當中拍《翠絲》的李駿碩(Jun)、《G殺》的李卓斌,都是出身杜琪峯發起的「鮮浪潮電影」。鮮浪潮先後發掘出《樹大招風》的導演歐文傑、許學文等。

 

Jun 17年憑短片《瀏陽河》成為當屆鮮浪潮冠軍得主,本身並非讀電影出身,純粹半途出家。Jun表示是導演舒琪找他拍《翠》片,相信跟自己修讀的學科有關:「搵我應該係知道背景讀性別研究,香港新導演對呢個題材有興趣、熟悉又冇包袱。」他笑言半途出家絕對沒有優勢,他以第一次參加鮮浪潮的作品《瀏陽河》為例,新導演在片場反而要加緊步伐同步:「第1次有啲拘謹,新導演試新嘢唔係必然因果。事實係鮮浪潮係一個好好嘅平台,發掘一啲冇機會拍過任何嘢嘅創作者去拍攝一個完整作品,對portfolio好有幫助。仲可以連繫唔單止同屆,同唔同屆嘅參賽者拉埋一齊,我第2套短片就係同唔同屆鮮浪潮班底一齊做。」他認為在鮮浪潮的平台,可以見到雙方作品,產生互惠關係,Jun補充:「可以話係一個里程碑或者跳板入行,至於而家係好定壞時代,行業萎縮緊,拍電影成本希望有咁低得咁低,好多已經有經驗嘅導演唔稀罕,所以令到新人有機會。」


《G殺》導演李卓斌05年已入行做過電影副導演及場記,11年以短片《網絡欺凌》參加鮮浪,接着有一段時間從事廣告同網絡工作。他覺得有拍攝經驗對完成一部電影有好處:「至少喺現場唔會驚,今次團隊都係自己拍廣告嘅班底。今次大家都希望做一啲喺港產片唔係成日見,呢種不一樣係忠於自己,但不一樣嘅嘢畀大家。」他認為近年新導演湧現,跟有經驗導演北上有關:「嗰班導演越拍越大,內地資金同製作條件先許可,亦可以試好多嘢。一班前輩去咗大陸拍戲,香港都需要電影,始終係一個電影之都,由以前到而家,無論市場幾萎縮,都會有香港製作出現。所以有啲小型資金,會搵新導演同題材去拍,加上政府首部劇情片,畀咗好多機會我哋班新人。」有人認為經歷十多年的鮮浪潮比賽洗禮,已成功孕育出新的導演團隊,李卓斌說:「鮮浪潮對電影圈有冇用,或者我講我嗰屆有乜嘢人,你就會知。我嗰屆有黃進、卓亦謙,一屆出咗3個導演。」他透露一屆約有20多人參賽,資助拍攝金額由過往4萬,提升到近年的10萬,除了有拍攝機會,更有播放平台,他說:「好多電影監製都留意鮮浪潮。」李卓斌笑言作為既得利益者,是一個好時代:「梗係好時代,我有機會拍戲先,其實當主流都唔賣錢,係一個point令大家再大膽啲,拍啲再行前啲嘅電影。」

 

另外,今年新導演高手林立,假如李卓斌可以投票的話,他會選張家傑《棟篤特工》贏新晉導演獎,他解釋說:「因為唔係好多人能夠同黃子華拍戲,個package好好先,以票房論佢收4,000萬,係最收得。同埋佢都係副導演出身,我會幾認同佢嘅經驗,同埋現場決策能力,涉及元素好似動作、喜劇都係比較難處理。」至於李駿碩則選《淪落人》導演陳小娟,相對較正路,他說:「議題上重要,一個好大人口,整體完成程度好高,亦都係一個好叻嘅導演。你畀我揀會揀佢,仲有友情因素。當然我都希望自己有機會,但就咁睇,佢機會高好多。有兩位新導演同時提名最佳導演,兩個都會睇高一線。」

 

新晉導演提名名單:
1.李卓斌《G殺》
2.陳詠燊《逆流大叔》
3.陳小娟《淪落人》
4.張家傑《棟篤特工》
5.李駿碩《翠絲》

 

原文