【經濟日報】杜琪峯專訪 為香港電影業出一分力

文/ 鄧龍傑

 

 

報章：經濟日報

日期：2015-11-25

 

薪火相傳，讓有志於影像創作的青少年作短片交流及比賽平台的「鮮浪潮國際短片展」，今年已是第 10 屆，發起人兼顧問杜琪峯說：「一定要做落去，到今日我的熱情未熄過。」他心中未熄的不止是對鮮浪潮的熱情，其實是對香港電影、我城年輕人的期望從未熄滅。

 

香港藝術發展局於 2005 年開始舉辦「鮮浪潮短片競賽」，為本地對電影有濃厚興趣或具潛質的電影新人類，提供接受資深導演及創作人的指導，以至創作及展示作品的機會。回望 10 年，杜 Sir 說：「最大轉變是當初只得十幾廿人參加，到今屆就有 330 人參賽。另外，以前很多年輕人問如何入行，有了鮮浪潮後，可能因比賽導師就是來自電影界，很多參賽者因此有機會入行。」

 

他總括十年來的比賽作品，並提出建議：「通常如果那年香港社會政治有大事，就有很多人拍七一大遊行；如果冇咩大事發生就拍愛情，可能他們都處青春期，對這些題材較有感受。整體我覺得未夠瘋狂未夠闊，其實生活每一點滴都很緊要，香港有很多嘢可以描寫，可以從某一點反映整個香港，或者人生、愛。小朋友唔需要一開始就係大師，做到少少嘢令人感動就得，要從真實的世界去諗、要親切，有時參賽作品較為虛無。」

 

為讓新秀實戰，杜 Sir 還起用 3 位鮮浪潮得獎導演合拍電影《樹大招風》，預計明年公映。「你唔畀機會，他們就冇，一定要提供出路。不是參加了鮮浪潮便是完結，需要持續栽培，一方面邊比賽一方面真的讓他們進入社會，因為冇第二個 step，成件事就唔夠力。《樹大招風》由籌備到拍完約 4 年，由游乃海監督，我睇完就同他講意見，再由他與他們修正，每個人都改了十幾廿次。同『湊』其他新導演差不多，我仍是注重創作，要他們自己拍想拍嘅嘢，而唔係跟我杜琪峯去諗，製作時間長的原因也是花在創作上。《樹大招風》後，正物色第二批（導演）去拍，希望下次不用 4 年。」

 

當然，10 年來外間對鮮浪潮也有批評，杜 Sir 大方說：「最重要是批評要有理據，如果講得啱，我們便立即修正，冇理由錯都繼續。我們都冇利益，電影界導師都係義工，任何人有意見，直接寫畀我，『炳』我都得，冇所謂，只要令件事有進步就得，合情合理嘅一定改。」

 

訪問當日，杜 Sir 匆匆趕來，據悉他做完一批鮮浪潮的宣傳訪問便要趕赴澳門工作。杜 Sir 為推廣鮮浪潮的瞓身程度，不比自己執導的作品少。本身工作已夠繁重，仍抽時間參與鮮浪潮，他指從未有一刻打算放棄：「一定要做落去，到今日我的熱情未熄過。亦須對社會有回報，我作為電影人，唔識做第二樣嘢，當然電影圈大把人叻過我，只要我仲有能力，應為香港電影業付出一些力量，只要精力仲可以應付就繼續，如果精神及時間唔得喇，都會搵接班人去做。」